पर्वत– जिल्ला खेलकुद विकास समिति पर्वतको अध्यक्षमा जंगबहादुर पुन बुद्ध मनोनित हुनुभएको छ ।
पर्वतको मोदी गाउँपालिका वडा नं. ४ हलहलेका पुनलाई गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाको निर्णय अनुसार प्रदेश खेलकुद विकास परिषद्का सदस्य सचिब श्रीधर शर्माले मंगलवार नियुक्त गर्नुभएको हो ।
विज्ञापन
पुनसँगै उपाध्यक्षमा राजन गुरुङ र कोषाध्यक्षमा जगत लामिछाने पनि मनोनित हुनुभएको छ । लामो समयदेखि खेलकुद क्षेत्रमा सक्रिय पुन नेकपा एमाले जिल्ला कमिटि पर्वतका सदस्य समेत रहनुभएको छ । मनोनित भएसँगै जिल्लाको खेलकुद क्षेत्रको विकास र प्रवद्र्धनमा पुर्ण रुपमा सक्रिय भएर लाग्ने उहाँको प्रतिवद्धता रहेको छ । अध्यक्षका लागि एमालेवाट अन्य व्यक्तिहरुको पनि दाबा रहेकोमा अन्त्यमा पुनको नियुक्ति भएको हो ।
यसैबीच गण्डकी प्रदेशका आठवटा जिल्ला खेलकुद विकास समितिका पदाधिकारीलाई मंगलवारनै पद तथा गोपनियताको सपथ ग्रहण गराईएको छ ।
गण्डकी प्रदेशका जिल्ला खेलकुद विकास समितिहरु गत फागुन ९ गते रिक्त भएका थिए । गण्डकी प्रदेश सरकारको नेतृत्व गरिरहेको नेपाली काँग्रेसले छ जिल्लामा अध्यक्ष सहित कोषाध्यक्ष र एमालेले पाँच जिल्लामा अध्यक्ष र कोषाध्यक्ष पाउनेगरी सहमति भए बमोजिम पदाधिकारीहरु मनोनयन गरिएको हो ।
नेपाली काँग्रेसले पाँच जिल्लामा उपाध्यक्ष र सचिब तथा एमालेले छ जिल्लामा उपाध्यक्ष र सचिब सहित पदाधिकारी मनोनयन गरिएको मन्त्रालयले जनाएको छ । समितिका अन्य सदस्यहरु भने नियुक्त हुन बाँकी रहेको छ ।
फेसबुक प्रतिक्रियाहरु