काठमाडौं, २० साउन । प्रधानमन्त्री केपी शर्मा ओलीले महामारी र राष्ट्रिय संकटलाई विरोधको अवसरका रुपमा लिने प्रबृत्ति फेर्नु पर्ने बताएका छन् । कोभिड–१९ र यसको रोकथामबारे स्वास्थ्य क्षेत्रका विज्ञहरुसँगको परामर्श बैठकमा प्रधानमन्त्री ओलीले महामारी सबैको साझा चुनौति भएकाले त्यसलाई मिलेर सामना गर्नु पर्ने बताएका हुन् ।

प्रधानमन्त्री ओलीले कोरोना महामारी नियन्त्रण सरकारले गर्ने कामले मात्र सफल नहुने जनाउँदै जति धेरै जनचेतना जगाउन सक्यो यस विरुद्धको लडाईं त्यति छिटो सफल हुने वताए । ‘कोभिड–१९ को विश्वब्यापी महामारी नियन्त्रण सरकारले गर्ने काम र प्रयासले मात्र सम्भव छैन, जनतामा चेतना जति बढाउन सकिन्छ, कोरोना बिरुद्धको लडाईं जित्न त्यति सजिलो हुन्छ’ प्रधानमन्त्री ओलीले भने ।

विज्ञापन

उनले यस्ता राष्ट्रिय संकट र महामारीलाई विरोधको अवसरका रुपमा लिने प्रबृत्ति बढेकाले यस्तो प्रबृत्ति त्याग्नुपर्ने वताए । ‘यस्तो संकट र महामारीलाई पनि विरोध गर्ने अवसरका रुपमा लिने प्रबृत्ति बढेको छ, यसलाई बदल्नु पर्छ’ प्रधानमन्त्री ओलीले भने,‘यता पल्टाएर पनि विरोध, उता पल्टाएर पनि विरोध, कहिले लकडाउन किन नगरेको भनेर विरोध, कहिले किन लकडाउन नखोलेको भनेर विरोध । सामाजिक अनुशासनले कोरोना पराजित गर्न मद्दत पुग्छ, यसलाई विरोधको अवसर ठान्नु हुन्न ।’

प्रधानमन्त्री ओलीले स्वास्थ्यकर्मी, उपकरण, संरचना आदि सबै हिसावले कमजोर रहेको अवस्थामा पनि सबै प्रवन्ध गरेर कोरोना नियन्त्रणका लागि प्रभावकारी कदम चालेको वताए । ‘हाम्रो कार्यान्वयन एकदमै कमजोर रहेका होइन, स्वास्थ्यकर्मी, उपकरण र संरचनाका हिसावले हामी कमजोर थियौं’ प्रधानमन्त्री ओलीले भने, ‘हामीले यस महामारी आएपछि पूर्वाधार बनाएर सक्षम, सम्पन्न र बलियो स्वास्थ्य पूर्वाधार भएका देशहरुको तुलनामा सफलता हासिल गरेका छौं ।’

उनले जनतामा हुने असन्तुष्टि र आक्रोशलाई आफूले स्वाभाविक रुपमा लिने वताउँदै फरक आस्था र विश्वासकै कारण राम्रो कामको पनि विरोध गर्ने प्रबृत्तिसँग भने सजग रहनु पर्ने वताए । ‘जनताका सामान्य असन्तुष्टि र आक्रोशलाई स्वाभाविक मान्न सकिन्छ, तर जे ग¥यो त्यसको आँखा चिम्लेर विरोध गर्ने जुन परिपाटी छ, त्यसले सही बाटो देखाउँदैन’ प्रधानमन्त्रीले भने,‘विरोध एउटा विषयमा गरेको हुन्छ, विरोधको उद्देश्य अर्कै कुरासँग गाँसिएको हुन्छ । भर्खर गाउँ गाउँमा निकासा दिएएको रकमको हिसाव खै भन्ने शैलीको विरोध हुन्छ ।’

प्रधानमन्त्री ओलीले असल कामको समर्थन र गलत कामको विरोध गरे विरोधको पनि नैतिक हैसियत रहने वताए । ‘विरोध भयो खराव काम गरिएछ कि भन्ने अवस्था नै रहेन, सरकारले गरेको भनेपछि जस्तो भए पनि विरोध गर्नु कर्तब्य हो भनेजस्तो भयो’ प्रधानमन्त्रीले भने,‘असल कामको समर्थन र खराव कामको विरोध गरे, विरोधको पनि नैतिक हैसियत हुन्थ्यो । यहाँ त जे ग¥यो त्यसको विरोध, कसैले राम्रो भयो भने त्यसलाई पनि खेद्ने काम हुन्छ ।’

कार्यक्रममा प्रधानमन्त्री कार्यालयका सचिव महेन्द्र गुरागाईंले प्रतिदिन १८ हजार जनासम्मको पीसीआर परीक्षण गर्न सक्नेगरी ल्याब स्थापना गरिएको र हालसम्म ४ लाख जनाको परीक्षण गरिएको रिपोर्ट प्रस्तुत गरेका थिए । कार्यक्रममा प्रमूख प्रतिपक्षी दलका नेता शेरबहादुर देउवा, जसपाका अध्यक्ष महन्थ ठाकुर पनि सहभागि थिए । तस्विर : प्रधानमन्त्री ओलीको सचिवालयA