असार २२, काठमाण्डौ । नेपाली काँग्रेसको केन्द्रिय समिति बैठकले सत्तारुढ दल नेकपाभित्रको आन्तरीक कलहमा प्रवेश नगर्ने निर्णय गरेको छ । प्रमुख प्रतिपक्षी दललाई नेकपा र सरकारको विवादमा ल्याईनु लागि निरुपेक्ष भएको धारणा कांग्रेसले अघि सारेको हो ।

केन्द्रिय समिति बैठकबारे जानकारी दिदै प्रवक्ता बिश्वप्रकाश शर्माले काँग्रेसलाई जनताले दिएको म्याण्डेट अनुसार प्रतिपक्षमै रहने स्पष्ट पारेका हुन् । अहिले कुनै पनि बाहनामा कांग्रेस सरकारमा सामेल नहुने उनको भनाई छ । प्रवक्ता शर्माले नेकपा अध्यक्षद्धय पुष्पकमल दाहाल र केपी शर्मा ओलीसँग सभापती शेरबहादुर देउवाबिच भेटवार्ता भईरहे पनि ति सबै सत्ता राजनीतिका लागि निरर्थक हुने शर्माले बताए ।

विज्ञापन

कांग्रेसलाई सरकारमा सहभागि हुन प्रधानमन्त्रीले आग्रह गरेको भन्ने विषयमा शर्माले रमाइलो लागेको भन्दै व्यङ्ग्य गरे । कांग्रेस प्रतिपक्षीमा बसेर सरकारलाई आवश्यक सुझावमात्र दिइने र सरकार परिवर्तनको बिषयमा कांग्रेसलाई कुनै सरोकार नै नभएको शर्माले बताए ।

करीव एकसातासम्म चलेको केन्द्रिय समिति बैठकमा सदस्यहरुले सरकार असफल भएको धारणा राखेका थिए । कोरोना रोकथाम तथा नियन्त्रणमा असफल हुनु, सत्ता राजनीतिमा केन्द्रित हुनु, प्रधानमन्त्रीले सनकको भरमा प्रमुख प्रतिपक्षसँग परामर्श नगरी संसदको अधिवेशन अन्त्य गर्नुले नैतिकता गुमाएको कांग्रेसको ठहर छ । त्यसैगरी सरकार तथा नेकपाले राष्ट्रपतिलाई बिवादमा ल्याउने काम गरेको कांग्रेसको आरोप छ । यस्ता कारणहरुले वर्तमान सरकारले नैतिकता गुमाएको कांग्रेसले जनाएको छ ।

असार १६ गतेदेखि बसेको केन्द्रिय समिति बैठक आज सकिएको छ ।