पर्वत,नेकपा (एमाले) को आगामी ११औँ महाधिवेशनका लागि प्रतिनिधि छनोट प्रक्रिया पर्वतमा तीव्र विवादमा पुगेको छ। अध्यक्ष केपी शर्मा ओली पक्ष र वरिष्ठ उपाध्यक्ष ईश्वर पोखरेल पक्षबीच केन्द्रीकृत रूपमा बढ्दै गएको प्रतिस्पर्धाको असर जिल्ला तहमा समेत देखिएको हो।

पर्वतमा पोखरेल पक्षमा खुलेर क्रियाशील रहँदै आएका पूर्वमन्त्री विकास लम्साललाई प्रतिनिधि जाने बाटो रोकिएपछि जिल्ला कमिटीभित्रको मतभेद सतहमै आएको छ। सूचीमा आफ्नो नाम समावेश नगरिएकोप्रति नेता लम्सालले कडा आपत्ति जनाउँदै यसलाई “पार्टीलाई एकल कब्जा गर्ने नियत” को परिणाम बताएका छन्।

विज्ञापन

लम्सालले प्रतिक्रिया दिँदै “पार्टीलाई एकाधिकार बनाएर कब्जा गर्ने अपराधिक सोचले मलाई हटाइयो। दुई धार स्पष्ट भएपनि समन्वय र सहमतिको नाममा ममाथि प्रहार भयो। यसको हिसाब–किताब कार्यकर्ताले गर्नेछन्।”

उनका अनुसार आफूलाई लक्षित गरेर योजनाबद्ध रूपमा प्रतिनिधि प्रक्रियाबाट बाहिर धकेल्ने काम गरिएको छ, जसले पार्टीभित्रको आन्तरिक असन्तुलन झनै उजागर गरेको छ।

यसैबीच, जिल्ला एमालेले महाधिवेशन प्रतिनिधिमा अनुमोदित नामावली सार्वजनिक गरेको छ, जसमा खुल्ला, महिला, दलित र युवा कोटा रहेका छन्। पर्वतबाट सबै क्षेत्र गरि १४ जना प्रतिनिधि महाधिबेशनमा सहभागि हुने बताइएकोछ । ७७ जना आकांक्षीहरु मध्ये पाटिले सर्वसहमत रुपमा १४ जनाको नाम टुंगाएको हो ।

पाटी केन्द्रीय सदस्य पदम गिरीको संयोजकत्वमा केन्द्रीय सदस्यहरु कल्पना चापागाईं र मनोहर बि। पौडेललाई सर्वसहमत प्रतिनिधि टुंगाउने जिम्मेवारी प्रदान गरेको थियो

पर्वतबाट चुनिएका प्रतिनिधिमा खुल्ला तर्फ गोबिन्द पहाडी, राजुप्रसाद पौडेल, पदमाणी शर्मा, देबेन्द्रराज पाण्डे, ईश्वरी भुषाल र शिव पौडेल रहनुभएको छ ।

यसैगरी युवा तर्फ जिल्ला उपाध्यक्ष बिमल लामिछाने छनौट हुनुभएको छ । युवाबाट ८ जना आकांक्षी रहेका थिए ।

यसैगरी दलित तर्फ बिष्णुराम बिक, निर्मल नेपाली र शर्मिला नेपाली रहनुभएको छ भने महिला तर्फ हिरादेबी शर्मा, यामकुमारी राना, हेमकुमारी अधिकारी र कमला पन्त रहनुभएको छ ।

महाधिवेशन प्रतिनिधिमा विहादी गाउँपालिकाबाट कोहिपनि परेनन् भने कुश्माबाट चार, फलेवासवाट दुई, महाशिलावाट तीन, मोदीवाट दुई र जलजलावाट एक र पैंयूवाट दुई जना परेका छन् ।

प्रतिनिधि छनौटमा पक्षपात गरिएको र पार्टीमा योगदान गरेका नेताहरुलाई नै बेवास्ता गरिएको भन्दै सामाजिक सञ्जालमा विभिन्न टिप्पणीहरु हुन थालेका छन् ।