काठमाडौं ।

नेकपा एमालेमा सक्रिय राजनीतिमा पुनः फर्किएकी पूर्वराष्ट्रपति विद्या भण्डारीले अब कार्यकर्ता माझ जाने तयारी थालेकी छन् । पार्टी केन्द्रीय कमिटिबाट सदस्यता हटाउने निर्णय र एमाले नेतृत्वसँग दूरी बढ्दै गएको पृष्ठभूमिमा उक्त निर्णयका बिरुद्द्मा देशभर अभियान चलाउने तयारी थालिएको हो। यसपछि भण्डारीका पक्षधरहरूले ‘सर्वसत्तावादको विरुद्ध फरक मत’ अभियान अघि बढाउने घोषणा गरेका छन् ।

विज्ञापन

एमाले नेता विकास लम्सालका अनुसार यसै अभियान अन्तर्गत विद्या भण्डारी पक्षले आगामी साउन १३ गतेभित्र राष्ट्रिय भेला आयोजना गर्ने तयारी गरेको छ । उक्त भेलालाई विद्या भण्डारी स्वयंले सम्बोधन गर्ने सम्भावना छ । लम्सालका अनुसार, “अब हामी कार्यकर्ता माझ जानेछौं, ७७ वटै जिल्लामा फरक मतसहित जिल्ला भेला गर्नेछौं । ओलीजीको सर्वसत्तावादी प्रवृत्तिको विरुद्धमा हाम्रो अभियान सुरु हुन्छ ।”

पार्टीभित्र दबाबमूलक अभियान

नेता लम्सालले पार्टी भित्रै दबाबमूलक गतिविधि संचालन गरिने जानकारी दिए । उनका अनुसार, भदौमा हुने विधान महाधिवेशनमा फरक मत दर्ता गराउने तयारी समेत भइरहेको छ । “हामी महाधिवेशनसम्म संगठनात्मक र वैचारिक बहस बढाउँदै लैजानेछौं,” लम्सालले भने, “संगठनभित्रै लोकतन्त्रको पक्षमा लडाइँ लड्नेछौं ।”

पूर्वराष्ट्रपति भण्डारीको भूमिकामा परिवर्तन

विद्या भण्डारी, जो दुई कार्यकालसम्म नेपालकी राष्ट्रपतिको भूमिकामा थिइन्, एमालेको महिला आन्दोलनबाट राजनीतिमा उदाएकी थिइन् । राष्ट्रपतिबाट निवृत्त भएसँगै उनले केही राजनीतिक गतिविधिमा सहभागिता जनाएकी थिइन्, तर हालै खुलेर पार्टी नेतृत्वप्रति असन्तुष्टि जनाउँदै सक्रिय राजनीतिमा फर्किने संकेत दिएकी छन् ।

उनको सक्रियता पछिल्लो समय एमाले अध्यक्ष केपी शर्मा ओलीको एकल निर्णयशैलीप्रति असन्तुष्टि को रूपमा हेरिएको छ । पार्टीले भण्डारीको आलोचना र फरक धारलाई स्वीकार नगरेर सदस्यता नै नवीकरण नगरेपछि उनी निकट नेताहरूले सशक्त वैकल्पिक धार निर्माण गर्ने रणनीति तय गरेका छन् ।

७७ वटै जिल्लामा कार्यक्रम

राष्ट्रिय भेलापछि विद्या भण्डारी पक्षले देशभर ७७ वटै जिल्लामा जिल्ला स्तरका भेला आयोजना गर्ने योजना बनाएको छ । यी भेलाहरूमा स्थानीय स्तरमा भण्डारीको समर्थनमा रहेका नेता तथा कार्यकर्ताहरूको सहभागिता हुने अपेक्षा गरिएको छ ।

यस्तै, केही जिल्ला नेतृत्वहरू भण्डारीको पक्षमा उभिन सक्ने आकलन गरिएको छ । यद्यपि एमाले पार्टी नेतृत्वले भने यसलाई ‘व्यक्तिगत असन्तुष्टि’ को रूपमा लिँदै आएको छ । पार्टी सचिवालयका एक सदस्यले नाम नखुलाउने शर्तमा भने, “पार्टी अनुशासन विपरीत जानेहरूलाई समयमै सचेत गराउनेछौं ।”

महाधिवेशनमा बढ्दो ध्रुवीकरण

भदौमा हुने एमालेको विधान महाधिवेशन पार्टीभित्रको वैचारिक र संगठनात्मक ध्रुवीकरणको मुख्य केन्द्र बन्ने देखिएको छ । भण्डारी पक्षका नेताहरूले संगठनात्मक सुधार, आन्तरिक लोकतन्त्र र नेतृत्वमा वैकल्पिक धारको आवश्यकता उठाउँदै आएका छन् ।

राजनीतिक विश्लेषकहरूका अनुसार यो विवादले एमालेभित्र वैचारिक बहसलाई पुनः ताजा बनाएको छ । पूर्वप्रम खड्गप्रसाद ओलीको ‘कन्सोलिडेसन अफ पावर’ को शैली र विद्या भण्डारीको नयाँ पहलबीच टकराव राजनीतिक रूपमा गम्भीर मोडमा जान सक्ने सम्भावना देखिन्छ ।