बाग्लुङबाट पोखरा गरेको जीप पर्वतको कुश्मा स्थित तमादीखोलाले बगाउँदा बेपत्ता भएका तीन जनामध्ये एक जनाको शव फेला परेको छ ।

जिल्ला प्रहरी कार्यालय पर्वतका प्रमुख डीएसपी खुमलाल खुमलाल भुसालका अनुसार केही समय अघि खोजीको क्रममा एक जनाको शव भेटिएको हो । जीपको केही भाग मोदीखोला दोभानमा भेटिएको छ । त्यहीँ नेपाली सेना, सशस्त्र प्रहरीसहित नेपाल प्रहरी टोलीले खन्न सुरु गरेको छ ।

विज्ञापन

डिएसपी भुसालका अनुसार इन्स्पेक्टर अविनास जिसीको नेतृत्वमा जिल्ला प्रहरी कार्यालयको टोली खोजी कार्यमा जुटेको छ । डिएसपी भुसालले चालक अहिले प्रहरीकै सम्पर्कमा रहेको बताए ।

उनले भने– ‘माथितिर झनै बढी बर्षा भएको रहेछ । खहरे खोला उर्लेर आयो । खोलानेर जीप पुग्दा पार गर्न नसकेपछि रोकेर ओड लगाउन लाग्दा ग्रेगरसहितको बाढी आएर जीप बगायो । भित्र रहेका तीन जना पनि सँगै बगे भनेर चालकले भनेका छन् । एक जना बाग्लुङबाटै चढेको र २ जना बीचबाट चढेको उनले बताएका छन् ।’ यात्रु सबै पुरुष हुन् ।

ग१ज ६२१३ नम्बरको जीप शनिबार साँझ साढे ६ बजे खोलाले बगाउँदा जीपसहित ३ जना वेपत्ता भएका हुन् । पर्वतको कुश्मा नगरपालिका वडा नं. ७ र ८ को सीमा खोला तमादीमा आएको बाढीले खोला पार गरिरहेको जीपलाई बगाएको सर्वप्रथम त्यहाँबाट पत्रकार कृष्ण अखेलीले जानकारी दिए ।  तमादीखोला चुवा र खरेहा नजिकैको खोला हो । जहाँ पुल छैन । कजवे पार गर्ने क्रममा जीप बगेको हो ।